కరీంనగర్//మే03(ఆకాంక్ష ): కరీంనగర్ నగరంలో ఆదివారం పట్ట పగలే జరిగిన సాయుధ దోపిడీ ఘటన తీవ్ర కలకలం రేపింది. నగరంలోని ప్రధాన రహదారిపై ఉన్న ప్రముఖ పీఎంజే జ్యువెలరీ షోరూమ్‌ను లక్ష్యంగా చేసుకుని నలుగురు గుర్తు తెలియని దుండగులు కాల్పులకు పాల్పడి భారీ మొత్తంలో బంగారు ఆభరణాలను దోచుకెళ్లారు. ఈ ఘటనతో నగర ప్రజల్లో భయాందోళనలు నెలకొన్నాయి. రద్దీగా ఉండే ప్రాంతంలో మధ్యాహ్న సమయంలో జరిగిన ఈ దాడి స్థానికులను ఒక్కసారిగా షాక్‌కు గురిచేసింది.సమాచారం ప్రకారం, కస్టమర్ల ముసుగులో షోరూమ్‌లోకి ప్రవేశించిన నలుగురు వ్యక్తులు కొద్దిసేపు సాధారణంగా వ్యవహరించారు. అనంతరం ఒక్కసారిగా ఆయుధాలు బయటకు తీసి షోరూమ్ సిబ్బందిని బెదిరించారు. దుండగుల ప్రవర్తనను గమనించిన సిబ్బంది వారిని అడ్డుకునేందుకు ప్రయత్నించగా, పరిస్థితి ఉద్రిక్తంగా మారింది. దీంతో దొంగలు తమ వద్ద ఉన్న తుపాకులతో కాల్పులు జరిపినట్లు సమాచారం.కాల్పుల శబ్దంతో షోరూమ్‌లో ఉన్న సిబ్బంది, కస్టమర్లు తీవ్ర భయాందోళనకు గురయ్యారు. కొందరు బయటకు పరుగులు తీశారు.ఈ ఘటనలో నలుగురు షోరూమ్ సిబ్బందికి గాయాలైనట్లు తెలిసింది. గాయపడిన వారిని వెంటనే సమీప ఆస్పత్రికి తరలించి చికిత్స అందిస్తున్నారు. వారి ఆరోగ్య పరిస్థితిపై వైద్యులు పర్యవేక్షణ కొనసాగిస్తున్నారు. దుండగులు షోరూమ్‌లో ప్రదర్శనకు ఉంచిన బంగారు ఆభరణాలను లక్ష్యంగా చేసుకుని వేగంగా దోపిడీ జరిపినట్లు తెలుస్తోంది. సిబ్బందిని భయభ్రాంతులకు గురిచేసి, కొద్ది నిమిషాల్లోనే భారీ మొత్తంలో బంగారు నగలను సేకరించి అక్కడి నుంచి పరారయ్యారు. ఈ ఘటన మొత్తం అత్యంత ప్రణాళికాబద్ధంగా జరిగినట్లు పోలీసులు అనుమానిస్తున్నారు. సమాచారం అందుకున్న వెంటనే కరీంనగర్ పోలీసులు ఘటనా స్థలానికి చేరుకుని పరిస్థితిని అదుపులోకి తీసుకున్నారు. షోరూమ్ పరిసర ప్రాంతాన్ని పూర్తిగా తమ ఆధీనంలోకి తీసుకుని క్లూస్ టీం సహాయంతో పరిశీలనలు చేపట్టారు. ఘటనాస్థలంలో వేలిముద్రలు, సీసీ కెమెరా ఆధారాలు, ఇతర భౌతిక సాక్ష్యాలను సేకరించారు. దొంగలు పరారయ్యే క్రమంలో ఒక బుల్లెట్ల మ్యాగజైన్‌ను అక్కడే వదిలివెళ్లినట్లు పోలీసులు గుర్తించారు. దానిని స్వాధీనం చేసుకుని ఫోరెన్సిక్ పరీక్షలకు పంపేందుకు సిద్ధమవుతున్నారు. ఈ మ్యాగజైన్ దర్యాప్తులో కీలక ఆధారంగా మారే అవకాశముందని అధికారులు భావిస్తున్నారు. దుండగులు ఏ దిశగా వెళ్లారు, ఎలాంటి వాహనాన్ని ఉపయోగించారు అనే వివరాలను తెలుసుకునేందుకు నగరంలోని పలు సీసీ కెమెరాల ఫుటేజీలను పోలీసులు పరిశీలిస్తున్నారు. ఘటనకు ముందు మరియు తర్వాత అనుమానాస్పదంగా సంచరించిన వ్యక్తులపై ప్రత్యేక దృష్టి పెట్టారు.ఈ ఘటన నేపథ్యంలో కరీంనగర్ జిల్లా పోలీసులు అప్రమత్తమయ్యారు. నగరం నుంచి బయటకు వెళ్లే ప్రధాన రహదారుల వద్ద తనిఖీలు నిర్వహిస్తున్నారు. సరిహద్దు జిల్లాల పోలీసులకు సమాచారం అందించి అలర్ట్ జారీ చేశారు. అనుమానాస్పద వాహనాల తనిఖీలు ముమ్మరం చేశారు.పట్టపగలే రద్దీ ప్రాంతంలో ఇలాంటి సాయుధ దోపిడీ జరగడం నగర భద్రతపై ప్రశ్నలు లేవనెత్తుతోంది. దుండగులు అంతర్రాష్ట్ర ముఠాకు చెందినవారా, లేక స్థానికంగా సమాచారం సేకరించి దాడి చేశారా అనే కోణాల్లో పోలీసులు దర్యాప్తు చేస్తున్నారు.
ఘటనకు సంబంధించి పూర్తి వివరాలు వెలుగులోకి రావాల్సి ఉండగా, నగర ప్రజలు మాత్రం ఈ ఘటనతో తీవ్ర ఆందోళన వ్యక్తం చేస్తున్నారు. కరీంనగర్‌లో భద్రతా చర్యలను మరింత కట్టుదిట్టం చేయాలని స్థానికులు డిమాండ్ చేస్తున్నారు.